شريف إكرامي يعلن اعتزاله كرة القدم.. ورسالة إلى الأهلي

أعلن شريف إكرامي حارس مرمى فريق بيراميدز الحالي والأهلي السابق، عن اعتزاله كرة القدم بعد انتهاء الموسم الحالي.

وكان شريف إكرامي قد لعب في صفوف العديد من الأندية على رأسهم النادي الأهلي وبيراميدز بالإضافة إلى خوضه فترة مع فينورد الهولندي.
 

بيان شريف إكرامي

وكتب إكرامي على حسابه عبر موقع إكس: "بعد أكثر من 30 سنة، جه الوقت اللي أودع فيه الملعب وأعلق الجوانتي".

وأضاف: "جه وقت إني أخد قرار، يمكن كل لاعب بيبقى عارف إنه هييجي في يوم من الأيام لكنه عمره ما بيبقى سهل، لأنك مش بتسيب شغلانة أنت بتسيب حياة كاملة، شكرًا لكل نادي لعبت فيه".

وتابع: "فينورد والجونة كل واحد فيكم ضاف لي كثيرًا كإنسان مش بس كلاعيب، شكرًا بيراميدز اللي ختمت فيه وكنت محظوظ أكون جزء من جيل حفر تاريخ لنفسه وللنادي".

وواصل: "لكن هيفضل للنادي الأهلي مكانة مختلفة في قلبي، النادي الأهلي مش مجرد نادي لعبت فيه، ده المكان اللي اتولدت فيه، كبرت واتعلمت ونضجت فيه ومنه الناس عرفتني وحققت فيه كل اللي كنت بحلم بيه كلاعب، الأهلي غير أي حد".

وأكمل: "شكرًا لكل مدرب دربني، ولكل لاعب شاركني أوضة اللبس، ولكل عامل وإداري اشتغل في صمت عشان يساعدنا ننجح، شكرًا لكل الجمهور اللي ساندني في الرحلة وشكرًا لكل اللي انتقدوني، لأنكم كنتو سبب في الإنسان اللي بقيت عليه النهارده".

وأختتم: "و عشت معاكم أجمل لحظات في حياتي واتعلمت منكم في أصعبها، وشكرًا لعيلتي اللي كانت حاضره في كل لحظة واستحملت ضغوطات الشغلانه أوقات أكتر مني أنا، من قلبي بقولكم وبقول للكورة
شكرًا".